കോയിപ്രം  : കോയിപ്രം പോലീസ് സ്റ്റേഷൻ റോഡിൽ അനധികൃതമായി വാഹനങ്ങൾ പാർക്ക് ചെയ്യുന്നതുമൂലം ഗതാഗത തടസ്സം പതിവാകുന്നു. പുല്ലാട് ജങ്ഷനിൽനിന്ന്‌ കോയിപ്രം പോലീസ് സ്റ്റേഷനിലേക്കും പൂവത്തൂരേക്കും പോകുന്ന പ്രധാന വഴിയാണിത്. വീതി കുറഞ്ഞ റോഡിന്റെ ഇരുവശത്തും വാഹനങ്ങൾ അലക്ഷ്യമായി പാർക്ക് ചെയ്യുന്നതാണ് ഗതാഗതക്കുരുക്ക് സൃഷ്ടിക്കാൻ പ്രധാന കാരണം. ഇരുചക്രവാഹനങ്ങൾ അടക്കമുള്ള വാഹനങ്ങൾ രാവിലെമുതൽ വൈകുന്നേരംവരെയാണ് പാർക്ക് ചെയ്യുന്നത്. ചിലയിടങ്ങളിൽ റോഡിലേക്ക് ഇറക്കി വാഹനങ്ങൾ പാർക്ക് ചെയ്യുന്നതിനാൽ മറ്റുള്ള വാഹനങ്ങൾക്ക് കടന്നുപോകാൻ കഴിയാത്ത സ്ഥിതിയാണ്.

പലപ്പോഴും എതിരേയെത്തുന്ന വാഹനങ്ങൾക്ക്‌ കടന്നുപോകാനാകാത്ത വിധത്തിലാണ് പാർക്കിങ്. അവയിൽ തട്ടാതെ വേണം വലിയ വാഹനങ്ങൾക്ക്‌ കടന്നുപോകാൻ. അനധികൃത വാഹന പാർക്കിങ് മൂലം കാൽനട യാത്രക്കാരും ബുദ്ധിമുട്ടുകയാണ്. പാർക്ക് ചെയ്തിരിക്കുന്ന വാഹനങ്ങൾക്ക് ഇടയിലൂടെ പോകുന്ന കാൽനടയാത്രക്കാരും പലപ്പോഴും അപകടത്തിൽപ്പെടാറുണ്ട്. റോഡിലേക്കിറക്കി വാഹനങ്ങൾ പാർക്ക് ചെയ്യുന്നതിനെതിരേ അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെടുന്നു.