പാലക്കാട് : പ്രഥമ സംസ്ഥാന മിനി ഖൊ-ഖൊ മത്സരത്തിൽ ആൺകുട്ടികളുടേയും പെൺകുട്ടികളുടേയും വിഭാഗത്തിൽ പാലക്കാട്‌ ജില്ല വിജയികളായി. 12 വയസ്സിൽ താഴെയുള്ള വിദ്യാർഥികളുടെ 28 ടീമുകൾ മത്സരത്തിൽ പങ്കെടുത്തു. ആൺകുട്ടികളുടെ വിഭാഗത്തിൽ പാലക്കാട് തിരുവനന്തപുരത്തേയും (10-5), പെൺകുട്ടികളുടെ വിഭാഗത്തിൽ പാലക്കാട് തൃശ്ശൂരിനെയും (11-5) തോൽപ്പിച്ചു. ആൺകുട്ടികളുടെ വിഭാഗത്തിൽ തിരുവനന്തപുരം രണ്ടാം സ്ഥാനവും കോഴിക്കോട് മൂന്നാം സ്ഥാനവും നേടി. പെൺകുട്ടികളുടെ വിഭാഗത്തിൽ തൃശ്ശൂർ രണ്ടാം സ്ഥാനവും ആലപ്പുഴ മൂന്നാം സ്ഥാനവും കരസ്ഥമാക്കി.

ആൺകുട്ടികളുടെ വിഭാഗത്തിൽ ബെസ്റ്റ് പ്ലെയർ അൻവേദ്-പാലക്കാട്, ബെസ്റ്റ് ഡിഫന്റെർ ചാരുഹാസ്-പാലക്കാട്, ബെസ്റ്റ് ചെയ്‌സർ എ.എസ്. അഭിനവ്-തിരുവനന്തപുരം എന്നിവരെ തിരഞ്ഞെടുത്തു. പെൺകുട്ടികളുടെ വിഭാഗത്തിൽ ബെസ്റ്റ് പ്ലെയർ അഞ്ജന-പാലക്കാട്, ബെസ്റ്റ് ഡിഫന്റെർ ഋത്വിക കെ.നായർ-തൃശ്ശൂർ, ബെസ്റ്റ് ചെയ്‌സർ എം. ശിഖ-പാലക്കാട് എന്നിവരെ തിരഞ്ഞെടുത്തു. ലക്ഷ്മിവിലാസം ഹൈസ്‌കൂളിൽ നടന്ന സമാപന സമ്മേളനം സംസ്ഥാന സ്‌പോർട്‌സ് കൗൺസിൽ വൈസ് പ്രസിഡന്റ്‌ എം.ആർ. രഞ്ജിത്ത് ഉദ്ഘാടനം ചെയ്തു. സ്‌കൂൾ പി.ടി.എ. പ്രസിഡന്റ്‌ എം.എ.ഉറൂബ് അധ്യക്ഷനായി.