തിച്ചൂർ : എരുമപ്പെട്ടി പോലീസ് നടത്തിയ പരിശോധനയിൽ തിച്ചൂർ വനത്തിൽനിന്ന് 500 ലിറ്റർ വാഷ് കണ്ടെത്തി നശിപ്പിച്ചു. വീപ്പകളിലും കുടങ്ങളിലുമായിട്ടാണ് വാഷ് സൂക്ഷിച്ചിരുന്നത്. കഴിഞ്ഞ രണ്ടുദിവസങ്ങളിൽ പറമ്പുകളിൽ സൂക്ഷിച്ചിരുന്ന 350 ലിറ്ററോളം വാഷ് കണ്ടെത്തി നശിപ്പിച്ചിരുന്നു. പരിശോധന ഭയന്ന് വാഷ് വനത്തിലേക്ക്‌ മാറ്റിയിട്ടുണ്ടെന്ന് രഹസ്യവിവരം ലഭിച്ചിരുന്നു. ഇതേത്തുടർന്ന് നടത്തിയ വ്യാപക പരിശോധനയിലാണ് വിവിധതരത്തിലുള്ള വലിയ വാഷ് ശേഖരം കണ്ടെത്തിയത്. ഇൻസ്പെക്ടർ എം.ബി. ലത്തീഫിന്റെ നേതൃത്വത്തിൽ സ്പെഷ്യൽ ബ്രാഞ്ച് എ.എസ്.ഐ. പി.വി. വത്സകുമാർ, എസ്.സി.പി.ഒ. ഐ.ബി. ഷാജൻ, സി.പി.ഒ.മാരായ വി.ആർ. ശ്രീനാഥ്, എസ്. തോമസ് എന്നിവരാണ് പരിശോധന നടത്തിയത്.